Հանրային քննարկման նիստը սկսվեց ժամը 12:00-ին;
Ներկա էին՝
Արթիկի համայնքապետարանի աշխատակազմիքարտուղար Ա.Գրիգորյանը, ֆինանսատնտեսական բաժնի պետ Գ. Վարագյանը, ավագանու անդամներ՝ Ո. Վարդանյանը, Ա. Չոփիկյանը, Ա. Նիկողոսյանը, աշխատակազմի բաժնի պետեր, կազմակերպությունների աշխատակիցներ, քաղաքացիներ:
Ընթացք.
Արթիկ համայնքի ղեկավար Մ. Վարագյանի կողմից լիազորված անձ` հանրային քննարկման պատասխանատու համայնքապետարանի աշխատակազմի քարտուղար Ա. Գրիգորյանի առաջարկով համայնքապետարանի աշխատակազմի ֆինանսատնտեսական բաժնի պետ Գ. Վարագյանը ներկայացրեց բյուջեի նախագիծն ընդհանուր գծերով և նախատեսված հիմնական ցուցանիշներով:
Այնուհետ նիստը վարողն առաջարկեց սկսել հարցադրումները:
Համայնքի բնակիչ Ա. Նահապետյանը հարց բարձրացրեց համայնքի փողոցներում թափառող կենդանիների թվի աճի վերաբերյալ և հարցրեց, թե ինչ քայլեր են ձեռնարկում տեղական իշխանություններն այդ հարցի լուծման ուղղությամբ, արդյոք համայնքի 2021 թվականի բյուջեում հատկացումներ նախատեսված են կենդանիների ստերջացման գործընթացի կազմակերպման համար:
Ա. Գրիգորյանը պատասխանեց, որ տարբեր ատյաններում բարձրացվել է թափառող շների աննախադեպ աճի, դրանց կացարանների ստեղծման և ստերջացման վերաբերյալ հարցերը: Նա նշեց, որ հարցը օրհասական է բոլոր համայնքներում: Շիրակի մարզում շների ստերջացում իրականացվում է միայն Գյումրիում, և նախնական պայմանավորվածություն ձեռք է բերվել այդ կազմակերպության հետ, որն առաջարկել են Գյումրիում պլանավորած գործողություններն իրականացնելուց հետո ձեռնամուխ լինել Արթիկում թափառող շների ստերջացմանը: Նախնական պայմանավորվածությամբ յուրաքանչյուր շան ստերջացումը համայնքի վրա կարժենա մոտ 40 000-50 000 ՀՀ դրամ: Անհրաժեշտ պահին մենք բյուջեից կհատկացնենք այդ ծախսերը:
Արթիկի ավագանու անդամ Ո. Վարդանյանն իր դժգոհությունն արտահայտեց թափառող շների մասին օրենքի ընդունման վերաբերյալ, նշելով, որ երկրում համապատասխան խնդրով զբաղվող կազմակերպությունների բացակայության պայմաններում նման օրենքներ չպիտի ընդունի օրենսդիր մարմինը: Բացի այդ մտավախություն հայտնվեց, որ ստերջացված շները մարդկանց, հատկապես երեխաների վրա ամեն դեպքում հարձակվում են, կան նման բազում օրինակներ:
Ա. Նահապետյանի մյուս հարցը ճանապարհային լուսավորության ընդլայնման ծրագրում ներառված փողոցներին էր վերաբերում, ինչպես նաև ծրագրի ավարտման ժամկետներին:
Ա. Գրիգորյանը պատասխանեց, որ 2020 թվականին սուբվենցիոն ծրագրով նախատեսված էր մոտ 500 հենասյուների տեղադրում և լուսավորության ցանցի արդիականացնում: Քանի որ մրցույթը շահող կազմակերպությունը նախահաշվարկային ամենաբարձր գնային շեմի սահմաններում էր մրցույթը շահել, համայնքն էլ ավելի ցածր գին էր նախատեսել, այդ պատճառով համայնքային և մարզային իշխանությունները որոշեցին այդ սուբվենցիոն ծրագիրն իրականացնել հաջորդ՝ 2021 թվականին: Ծրագրի իրականացմամբ 2021 թվականին Արթիկ համայնքը գրեթե ամբողջությամբ կլինի լուսավորված:
Ո. Վարդանյանը հարց բարձրացրեց պատերազմում վիրավոր զինծառայողներին հատկացվող 50 000-ական ՀՀ դրամների տրամադրման սկզբունքի վերաբերյալ: Նա մտավախություն հայտնեց, որ համայնքի բյուջեով հնարավոր չի այդքան գումար հատկացնել բոլոր վիրավորներին, նշելով, որ ՀՀ կառավարությունն արդեն իսկ սահմանել է պատերազմական գործողություններին մասնակիցների, վիրավորների և զոհվածների ընտանիքներին տրամադրվող փոխհատուցումների չափորոշիչներն ու գումարային սանդղակները:
Ֆինանսատնտեսական բաժնի պետ Գ. Վարագյանը պատասխանեց, որ այդ գումարները ՀՀ կառավարության կողմից տրվող գումարներ են, դրանք համայնքային բյուջեի հետ ոչ մի առնչություն չունեն: ՀՀ կառավարությունը հավելյալ դրամական միջոցներ է հատկացրել մարզպետարաններին, իսկ նրանք էլ իրենց հերթին համայնքներին՝ գումարը հնարավորինս արագ վիրավոր զինծառայողներին տրամադրելու նպատակով:
Ո. Վարդանյանը հարցրեց, թե արդյոք հայրենիքի պաշտպանության համար զոհված արթիկցիների պանթեոնի կառուցման համար համայնքային բյուջեով գումար նախատեսված է: Նա կարծիք հայտնեց, որ միգուցե փողոցներ չնորոգվեն, լուսավորության ցանցի ընդլայնում չլինի, բայց պանթեոնի կառուցումը գարնանը սեղմ ժամկետներում պիտի իրականացվի:
Ա. Գրիգորյանը պատասխանեց, որ գումար նախատեսված չէ, նախագիծ-նախահաշվարկային փաստաթղթերի ձևակերպումից հետո միայն պարզ կլինի՝ ինչ գումարի մասին է խոսքը: Պանթեոնը կկառուցվի, իսկ անհրաժեշտ ֆինանսական միջոցները բյուջեից ցանկացած պահին կհատկացվի ավագանու որոշմամբ:
Ա. Գրիգորյանը ներկայացրեց համայնքում իրականացվող դրամաշնորհային ծրագրերից մանրամասներ:
Ո. Վարդանյանը դժգոհություն հայտնեց իրականացվող ծրագրերի ավարտման վերջաժամկետների առնչությամբ, նա առաջարկեց ծրագրերով զբաղվող կազմակերպություններից հստակեցնել ծրագրերով նախատեսվող գործողությունների իրականացման վերջնաժամկետները:
<<Արթիկի մարզահամալիր>> ՀՈԱԿ-ի տնօրեն Հ. Երիցյանն առաջարկեց համայնքային բյուջեով նախատեսել ՀՈԱԿ-ի ջեռուցման համակարգի անցկացման ծախսերը: Նա ասաց, որ հատակը միջազգային ստանդարտներին համապատասխան վերանորոգվել է 2020 թվականին <<Աջակցություն Հայաստան>> ՀԿ-ի միջոցներով, մոտ 100 սան, մարզվելով ցուրտ պայմաններում, գրանցում են բարձր ցուցանիշներ՝ շահելով Եվրոպայի առաջնություններում իրենց
ուժերը չափելու հնարավորություններ: Անշուշտ, արդյունքներն ավելի բարձր կլինեն ջեռուցման առկայության դեպքում:
Նիստը վարող Ա. Գրիգորյանն առաջարկեց նախահաշիվ ներկայացնել ավագանուն, որից հետո կլուծվի կազմակերպությունում ջեռուցման համակարգի անցկացման հարցը:
Ա Գրիգորյանը նշեց, որ ՀՀ կառավարության միջոցներով համայնքում նախատեսվում է կառուցել տիպային մանկապարտեզ, որտեղ կարող են ընդունելություն կազմակերպել նաև մսուրային տարիքի երեխաների համար: Նա ասաց, որ բյուջեով պետք է իրականացվեն նաև մանկապարտեզի նախագծանախահաշվարկային փաստաթղթերի ծախսերը: Ինչին պետք է պատրաստ լինել՝ ապահովելով բյուջեյի մուտքերը:
Նիստն ավարտվեց ժամը 12:45-ին:
Հանրային քննարկման ուղիղ միացման հղումը՝ https://studio.youtube.com/video/lNSBG9ccnt8/edit